Режиссёр ва актёр Азамат Аҳроров актриса Шаҳзода Муҳамедова билан «Сен учун» номли фильмни суратга олиш учун Хитойга жўнаб кетгани ҳақида хабар берилган эди. Маълум бўлишича, улар Хитойда муаммога дуч келган.
Масалага ойдинлик киритиш мақсадида журналист Феруз Муҳаммад Азамат Аҳроров билан суҳбат уюштирди.
— Аввалги суҳбатимизда Хитойда «Сен учун» фильмини тасвирга олиб қайтаман, деган эдингиз. Шоу-бизнес вакиллари эса сиз ва актриса Шаҳзода Муҳамедовани Хитойга тўй лове-сторйъсини суратга тушириш учун кетган, деб айтмоқда.— Хитойга сафаримиздан асосий мақсадимиз фильм суратга олиш эди, бундан ташқари, Хитойдаги фильм олиш жараёнлари ва техникасини ўрганиш ҳамда саёҳат қилиш нияти ҳам бор эди. Бироқ кичик муаммога дуч келдик — с’ёмка учун зарур техника масаласида Хитойдаги дўстларимизга ишонган эдик, улар ҳозирча бу борада ёрдам беролмаяпти. Менинг ҳам, ижодий жамоамизнинг ҳам боши қотган. Ҳозирча кунимиз фақат саёҳат билан ўтмоқда. Агар техника топа олсак, фильмни ҳам албатта суратга оламиз.
— 15 сентябрь куни режиссёрлик фаолиятингиздаги тўртинчи фильм — «Нотаниш қотил» премьераси белгиланган. Фильмда бош ролларни сиз ва Шаҳзода Муҳамедова ўйнаган. Савол туғилади — саёҳат туфайли премьера қолдириладими ёки премьера туфайли саёҳат?— Саёҳат ҳам, премьера ҳам ўз вақтида бўлади. Хитойдаги саёҳатимиз узоғи билан яна 10—12 кун давом этиши мумкин. 15 сентябрь куни биз ҳам, фильмда рол ижро этган биздан бошқа барча актёр-актрисалар премьерада қатнашади.
— «Нотаниш қотил»нинг қисқа ролиги унинг ҳам ажойиб, айни вақтда ваҳимали фильм эканлигидан далолат беряпти. Эътиборга молик томони, роликнинг бошига «16+» деб ёзиб қўйилган. Бу фильмни 16 ёшдан кичик бўлган томошабинлар кўришига рухсат берилмайдими?— «Нотаниш қотил» — режиссёрлик фаолиятимдаги энг кўп вақт, куч ва маблағ сарфланган фильм. «16+» деган ёзувнинг боиси — фильмда қўрқинчли жанг саҳналари, эффектлар жуда кўп. Фильмда гиёҳвандликка қарши кураш, бу йўлдаги саъи-ҳаракатлар ва укасининг қасосини оладиган ака тақдири ҳақида ҳикоя қилинади. «Нотаниш қотил» ҳақиқий эркаклар кўрадиган фильм бўлган, деб ўйлайман. Нима бўлганда ҳам, ҳаққоний баҳони мухлислар беради.
— Ҳозирдан: «Шаҳзода ва мен билан боғлиқ саволларни берманглар», деяпсиз. Ҳали тўй бўлмасидан бу каби саволлар жонингизга тегдими?— Чиндан ҳам, бундай саволлар ҳозирданоқ жонимга тегди. Шаҳзода билан ҳаётимиз, шахсий ишларимиз иложи борича шахсийлигича, фақатгина ўзимиз ва ўзимизга алоқадор бўлган инсонларга тегишли бўлиб қолишини хоҳлардим. Иккаламиз ҳам санъат йўлидамиз, мухлислар имкон қадар ижодимизга, фильмларимизга қизиқиш билдиришларини хоҳлардик. Шу ўринда, ижтимоий тармоқларда бизни кузатиб бораётганларга ҳам бир оғиз сўзим бор: агар ижтимоий тармоқлардаги бизнинг саҳифаларимизга ноўрин, шахсиятимиз билан боғлиқ номақбул гап-сўзларни ёзмоқчи бўлишса, саҳифаларимизга кирмай қўяверишларини илтимос қилмоқчиман. Ҳар хил уйдирма, қочиримли гап-сўзлар, ноўрин саволлар жонимизга тегди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)