Таиланд полицияси мамлакатдаги портлашларни конституция бўйича ўтказилган референдум билан боғламоқда

Янги конституция лойиҳаси бўйича ўтказилган референдум якунларидан норози сиёсий кучлар Таиландда содир этилган портлашлар ортида турибди. Бу ҳақда матбуот анжуманида мамлакат полицияси раҳбари Чактип Чаичинда баёнот берди, деб маълум қилади «ТАСС».

«Барча воқеалар 7 августдан сўнг содир бўлди. Жабрланганларнинг кўпчилиги конституция лойиҳасини қўллаб-қувватлаганлардир», — деди у.

Охирги сутка мобайнида Таиланднинг олти провинциясида 14 портлаш рўй берди (1, 2). Жумладан, Пхукет, Хуахин сингари йирик курортлар, шунингдек, Транг, Сураттхани, Пхангнга, Чумпхон провинциялари нишон остига олинди. Краби ва Накхонситхаммарат провинцияларида ўт қўйиш билан боғлиқ воқеалар кузатилди. Тўрт киши ҳалок бўлди, 35 киши жароҳат олди.

7 август куни ўтказилган референдумда сайловчиларнинг 60 фоизидан кўпроғи қонун лойиҳасини қўллаб-қувватлаган эди.