Россиядаги «Циферблат» кафе тармоғининг асосчиси Иван Митин Facebook’да машҳурлигини ошириш мақсадида Like («Ёқтириш» – «Дарё» изоҳи) тугмасини босиб ўтириш учун махсус одамни ишга олди. Аммо у ҳақиқатни ошкор қилганида, Иван Митиннинг Facebook’даги янги «танишлари» уни дўстлари рўйхатидан ўчириб ташлади. TJournal воқеа ҳақида батафсил ҳикоя қилиб берди.
Иван Митин баҳор сўнгида ижтимоий тажрибани йўлга қўйди – нотаниш инсонларнинг Facebook’даги саҳифасида қолдирилган постларга Like босиб, шу орқали улардан ҳам шундай жавоб олишга қарор қилди.
Митин бегоналарнинг саҳифасидаги постларга Like босиш учун ўз вақтини сарфлаш самарасиз деб ҳисоблади ва HeadHunter сайтидан бу ишни ойига 20 минг рубль учун бажарадиган читалик қизни ишга ёллади. Like босувчи қиз учун Митин кимларга кўпроқ Like босиш ва қандай изоҳлар ёзиш ҳақида махсус кўрсатмалар тайёрлаб қўйди.
Митиннинг маълум қилишича, ушбу тажриба 2 ой давом этди ва у 7 август куни Facebook’даги саҳифасида тажриба муваффақиятли ўтганини қайд этди.
Бироқ ҳақиқат маълум қилинганидан икки кун ўтиб 1 000 га яқин фойдаланувчи Митинни ўз дўстлари рўйхатидан ўчириб ташлади. Унинг айтишича, аудитория қилинган ишни нотўғри тушунди. Аслида у қизни иш билан таъминлаб, саҳоватли иш қилганини билдирди.
Тажриба муаллифи фойдаланувчиларга қатъий талаб қўйди: улар уни ё дўстлари рўйхатига қайтиб қўшади, ёки қизни ишдан бўшатади.
Митиннинг ғояси жиддий бўлганми ёки йўқ, номаълум. 2015 йилнинг ноябрь ойида Митин журналистларни фактларни текширмасликда айблаб, «ТВЦ» телеканалини калака қилганди. Ишбилармоннинг дўстлари Митиннинг бундай феъл-атвори одатий эканини айтди. 2016 йилда «Циферблат» асосчиси бошқа воқеа ҳақида сўзлаб берганди: собиқ хотини билан ажрашганидан сўнг у мол-мулкини бўлишаётган вақтида ҳатто бирга юритган Instagram саҳифасини ҳам бўлишишига тўғри келганди. Якунда эса Митин саҳифани собиқ турмуш ўртоғига бериб, ўзига янги саҳифа очди.
Изоҳ (0)