Американинг Moon Express хусусий компанияси таннархи 10 миллион доллардан кам бўлган экспедицияни Ойга жўнатишни режалаштирмоқда. Бу ҳақда компания асосчиларидан бири ва бошқарув раиси Навин Жайн Fox News телеканалига берган интервьюсида маълум қилди, деб хабар бермоқда «ТАСС».
«Жон Кеннеди (АҚШнинг 35-президенти) сўзларини бошқачароқ талқин қилсак, Ойни у ерга бориш осонлиги учун эмас, фойдали бизнес эканлиги учун танлаяпмиз. Ойда қиймати 16 квадриллион доллар бўлган минераллар мавжуд. Авваллари Ойга учиш учун миллиардлаб долларлар керак бўларди, ҳозир эса Ернинг сунъий йўлдошига бориш учун бизнинг экспедиция 10 миллион доллардан кам бўлади», – деди Навин Жайн.
Аввалроқ Moon Express АҚШ ҳукуматидан 2017 йили Ойга экспедиция жўнатиш учун рухсат олганди.
Айни дамда Вашингтон Ойни ўзлаштириш режаси доирасида хусусий капитал билан ҳамкорликка урғу бермоқда. Халқаро космик станциясига юкларни ташувчи Dragon ҳаво кемасини яратган SpaceX ва бошқа компаниялар ҳам Moon Express ортидан эргашади.
Изоҳ (0)