Фарғоналик омилкор деҳқон Абдуваҳоб Мирзажонов янгиликка қўл уриб, бир туп олмада нақ 25 хилга яқин навли ҳосил етиштирмоқда. Бу ҳақда Фарғона вилояти ҳокимлиги расмий веб-сайти хабар берди.
«У олим ҳам, селекционер ҳам эмас, оддий томорқачи. Лекин унда ишқибозлик кучли ва шу нарса унда заминга меҳр-муҳаббат уйғотган», — дейилади хабарда.
Абдуваҳоб Мирзажонов аслида уста узумчи сифатида ном қозонган. Унинг томорқасида 20 дан зиёд узум нави парваришланяпти. Ҳаммаси сархил, сифатли ва харидоргир.
«Абдуваҳоб аканинг томорқаси худди тажриба майдонини эслатади. Ўзи ҳам олимлардек иш юритади, — дейилади мақолада. — Ҳар битта амалий тажрибасига белги қўйиб боради. Унинг бир тажриба дарахтида олхўрининг 3 хил, ўрикнинг 2 хил нави етиштирилмоқда».
Кашфиётчи узум кўчатларини нафақат баҳорда, балки йилнинг исталган пайтида ерга ўтқазиб парваришлаш мумкинлигини амалиётда кўрсатмоқда. Хандон писта кўчатларини маҳаллий шароитда кўпайтиряпти. Бизнинг маҳаллий шароитимизга мос келмайди, деб ҳисобланган субтропик мева тури – витаминга бой, хушхўр киви энди Олтиариқда ҳам ўстирилмоқда.
Изоҳ (0)