iPhone 6s ва iPhone 6s Plus ўрнига келадиган янги смартфонлар ташқи кўринишидан ўзидан олдинги Apple телефонларига ўхшаш бўлиши, наушник уланадиган анъанавий тешикча (разъём)дан холи бўлиши ва яхшиланган фотокамерага эга бўлиши кутилмоқда. Бу ҳақда Bloomberg ўз манбаларига таяниб хабар берди, деб ёзади «Интерфакс».
Bloomberg маълумотларига кўра, Apple смартфонининг навбатдаги авлодида «Уйга» тугмаси сиғимдор бўлади, уни босганда аввалги тугмани босгандаги каби чиқиллаш ҳис этилади. Янги Маc ноутбукларининг трекпадида қўлланилган ушбу эффект электр магнитлар тўплами вибрацияси билан изоҳланади.
Интернетда iPhone 7 линейкасидаги смартфонлар ҳақида анчагина миш-мишлар тўпланиб қолди. iPhone 7 ва каттароқ экранли iPhone 7 Plus, шунингдек, қўш камерали iPhone 7 Pro ҳам тилга олинди. Унинг қўш камераси тиниқроқ ва ёрқинроқ суратлар олиш имконини беради. Бир вақтнинг ўзида иккита камерага сурат олинади ва улар битта тасвирга жамланади.
Интернетда пайдо бўлган рендер-тасвирларда камера модули бироз туртиб чиққанини, шунингдек, пастки қисмидаги динамикларнинг иккита панжарасини кўриш мумкин, бу стереодинамиклар ўрнатилиши мумкинлигига ишора қилади. Янги қурилмалар iOS 10 асосида ишлайди, унинг бета-версияси ишлаб чиқувчилар учун 2016 йил 13 июнда тақдим этилган эди.