Япония ҳукумати 28,1 триллион иенадан (274 миллиард доллар) иборат мамлакат иқтисодиётини рағбатлантириш дастурини тасдиқлади. Тегишли қарор вазирлар маҳкамасининг 1 август, душанба кунги йиғилишида қабул қилинди, дея хабар беради «ТАСС».
Дастур болалар боғчалари ва мижозларга қараш муассасалари ходимлари меҳнатини рағбатлантириш, компания ходимлари ва иш берувчиларнинг суғурта тўловларини пасайтириш, шунингдек, инфраструктурани ривожлантиришга йўналтирилган. Жумладан, ҳукумат туризмни ривожлантириш учун инфраструктура қурилишини қўллаб-қувватлаш, 2045 йилга келиб Токио ва Осака ўртасида магнит ёстиқчаларидаги «Маглев» поездлари тармоғини ишга туширишни режалаштирмоқда.
Маблағларнинг бир қисми Европада бизнес олиб бораётган ҳамда Буюк Британия Евроиттифоқдан чиқишидан жабрланиши мумкин бўлган кичик ва ўрта компанияларга кўмак бериш учун сарфланади. Ҳукумат шахсий истеъмолни рағбатлантириш учун кам даромадли кишиларга 15 минг иена (146,5 доллар атрофида), ёшларга эса кундалик эҳтиёж маҳсулотларига ваучерлар ажратишни мўлжалламоқда.
Изоҳ (0)