Ўзбекистон спорт делегацияси XXXI ёзги Олимпия ўйинларида иштирок этиш учун 1 август куни Бразилиянинг Рио-де-Жанейро шаҳрига жўнаб кетди. Бу ҳақда ЎзА хабар берди.
Шу муносабат билан Тошкент халқаро аэропортида ўтказилган маросимда давлат ва жамоат ташкилотлари, спорт жамоатчилиги вакиллари, спортчиларнинг ота-оналари, оммавий ахборот воситалари ходимлари жам бўлди.
Тадбирда Ўзбекистон миллий олимпия қўмитаси раиси М. Усмонов, «Ўзбекистон ҳаво йўллари» миллий авиакомпанияси бош директори В. Тян ва бошқалар иштирок этди.
Давлат раҳбарининг 2013 йил 25 февралдаги «Ўзбекистон спортчиларини 2016 йилда Рио-де-Жанейро шаҳрида (Бразилия) бўлиб ўтадиган XXXI ёзги Олимпия ва XV Паралимпия ўйинларига тайёрлаш тўғрисида»ги қарорига мувофиқ спортчилар нуфузли мусобақага пухта тайёргарлик кўрди.
Бразилиянинг Рио-де-Жанейро шаҳрида ўтадиган бу галги Олимпия ўйинларида Ўзбекистон спортчилари академик эшкак эшиш, бадиий гимнастика, байдарка ва каноэда эшкак эшиш, бокс, дзюдо, енгил атлетика, оғир атлетика, спорт гимнастикаси, стол тенниси, сузиш, таэквондо (WTF), теннис, трамполин, ўқ отиш, эркин ва юнон-рум кураши каби қатор спорт турлари бўйича баҳслашади.
Дзюдо бўйича Ўзбекистон терма жамоаси аъзолари Соиб Қурбонов ва Гулноза Матниёзова, оғир атлетика бўйича Ўзбекистон терма жамоаси аъзоси Иван Ефремов спортчилар номидан сўзга чиқди.
Ўзбекистон спорт делегацияси Рио-де-Жанейро шаҳрига «Ўзбекистон ҳаво йўллари» миллий авиакомпаниясининг махсус самолётида жўнаб кетди.
Изоҳ (0)