Қодиров Чеченистон раҳбарлигига сайловларда қатнашиш учун ҳужжатларини топширди
Чеченистон раҳбари вазифасини бажарувчи Рамзан Қодиров республика раҳбари лавозими учун ўз номзодини рўйхатдан ўтказиш мақсадида сайлов комиссиясига ҳужжатларини топширди, деб ёзади «Ведомости» Қодировнинг Instagram саҳифасига таяниб.
«Бугун… мен Чеченистон раҳбари лавозими учун ўз номзодимни рўйхатдан ўтказиш мақсадида сайлов комиссиясига ҳужжатларимни топширдим», — дея қайд этди Қодиров.
«Рўйхатга олиш ҳақидаги қарор ‘Чеченистон Республикаси раҳбарини сайлаш тўғрисида’ги қонунга мувофиқ 3 августгача қабул қилинади», — дея таъкидлади у.
Сиёсатчи, шунингдек, ушбу лавозимга сайланса, ўз отаси, Чеченистон Республикасининг биринчи президенти Аҳмад Қодировнинг йўлини давом эттиришини таъкидлади. «Олдинда бизни кўп вазифалар кутмоқда. Россия президенти Владимир Путин ва Чеченистон халқи кўмагида биз вазифаларнинг барчасини амалга оширишимизга ишончим комил», — деди Рамзан Қодиров.
