«Алдагани қуда яхши» — премьераси бир йилга кечиккан фильм

Алишер Навоий номли киносаройда қарийб икки ойдан буён бирорта фильмнинг премьераси бўлгани йўқ — аксарият режиссёрлар ёз ойларида фильмлар тақдимотини ўтказмайди.

1 август куни режиссёр Науфал Сулаймонов томонидан суратга олинган «Алдагани қуда яхши» оилавий комедияси премьераси бўлиб ўтиши режалаштирилган. Тақдимот арафасида журналист Феруз Муҳаммад фильм режиссёри билан суҳбат уюштирди.

— «Алдагани қуда яхши» оилавий кинокомедиясининг ғояси, қисқача мазмуни ҳақида сўзлаб берсангиз.— Фильмда ҳозирги ёшларимизнинг оилавий ҳаётга нисбатан масъулиятсизлиги, ёлғончилик оқибатида келиб чиқадиган муаммоларни кулгу йўли билан кўрсатишга ҳаракат қилганмиз. Унда Муҳаммадисо Абдулхаиров, Севара Солиева, Зуҳра Солиева, Асқар Ҳикматов, Умид Шодмонов, Гулчеҳра Носирова сингари актёр-актирисалар бош ролларни ижро этган.

— Аксарият режиссёрларимиз баъзи бир актёрларни томошабинларга ёқади дея бир-бирига ўхшаш ролларда жуда кўп ўйнатишмоқда. Мисол учун, сиз санаган актёрлар жамоасидан ўрин олган Муҳаммадисо Абдулхайиров 2016 йилнинг биринчи ярим йиллигида тақдимоти бўлиб ўтган фильмларнинг еттитасида рол ижро этган. Муҳаммадисо Абдулхаировни томошабинлар яхши кўргани учун танладингизми ёки ҳақиқатдан фильм сценарийсида айнан унинг ижросига эҳтиёж бормиди?— Албатта, уни фильмда ижросига эҳтиёж катта бўлгани учун танлаганмиз. Танлаш жараёнида деярли барча актёрларни бириктирилган ролни томошабинга зарур даражада етказа олишига қараб танлаймиз. Бундан ташқари, сиз санаб ўтган омиллар ҳам ҳисобга олинади. Менимча, ҳар бир режиссёр фильми томошабинга маъқул келишини хоҳлайди.

— Кўплаб режиссёрлар ёзда премьера ўтказишдан қочади. Сиз премьера қилишга қўрқмаяпсиз, бунинг сабаби нима?— Сабаблари кўп. Биринчидан, фильм тайёр бўлганига бир йилдан ошди, аммо премьера кечикиб кетди. Иккинчидан, биз ҳам премьерани кузда ташкиллаштирмоқчи эдик, аммо 1 август кунига тўхталдик. Учинчидан, бу биринчи фильмим бўлгани сабабли қандайдир ҳаяжон ҳам таъсир қилган бўлса керак.

— Фильм премьераси нима сабабдан бир йилга кечикди?— Фильм «Ўзбеккино» қошидаги Бадиий кенгашда жуда узоқ турмади — бошқа кинокартиналар премьерасига қанча вақтда рухсат берилса, бизга ҳам шунча вақтда рухсат теккан эди. Кечикишга эса ўзимиз, ижодий жамоамизнинг шошмасдан ҳаракат қилгани сабаб бўлди, деб ўйлайман.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.