Асад Франция ҳукумати вакиллари билан махфий учрашганлиги ҳақидаги миш-мишларни рад этди
Сурия президенти Башар Асад Франция ҳукумати вакиллари билан терроризмга қарши курашишга бағишланган махфий учрашув ўтказилганлиги ҳақидаги миш-мишларни рад этди. Бу ҳақда «ТАСС» хабар бермоқда.
«Сурия ва Франция ҳукуматлари вакиллари ўртасидаги махфий учрашув ҳақида гапирадиган бўлсак, бундай учрашув бўлмаган ва бўлиши ҳам мумкин эмас. Ҳар қандай бу каби учрашув махфий эмас, очиқ-ойдин бўлиши лозим. Сиёсатчилар ўртасидаги махфий учрашувлар нега керак? Биз нимани яширишимиз мумкин?» — деди Асад Грециянинг Epsilon TV телеканалига интервью бериш давомида.
«Қолаверса, француз ҳукумати Суриядаги террорчиларни қўллаб-қувватлашда ‘найзанинг учи’ бўлган. Бизда учрашиш учун ҳеч қандай сабаб йўқ, чунки дастурларимиз бутунлай бир-биридан фарқ қилади. Бизнинг кун тартибимиздан терроризмга қарши курашиш жой олган, Франция эса террорчиларни қўллаб-қувватлаб, турли баҳоналар билан Суриянинг ички ишларига аралашишни афзал кўрган», — дея қўшимча қилди Сурия етакчиси.
