Дакардаги махсус трибунал Чаднинг собиқ президенти Хиссен Хабре унинг хатти-ҳаракатлари туфайли жабрланганларга товон пули тўлаши лозимлигини белгилади. Бу ҳақда, AFP’га асосланиб, «ТАСС» хабар бермоқда.
Ҳар бир кишига 15–30 минг евро миқдорида товон пули тўланиши айтилмоқда.
Африка иттифоқи томонидан Сенегал ҳукумати билан келишилган ҳолда яратилган махсус трибунал вакилининг сўзларига қараганда, товон пуллари жинсий зўравонлик қурбонлари, ноқонуний ҳибсда сақланганлар, шунингдек, президентнинг хатти-ҳаракатлари туфайли жабрланганларга тўланади. Жабрланувчиларнинг аниқ сони айтилмади.
Май ойининг охирида махсус трибунал Чаднинг собиқ президентини инсониятга қарши жиноятларни содир этишда айбдор деб топиб, бир умрлик қамоқ жазосига ҳукм этган эди.
73 ёшли Хабре 1982–1990 йиллар мобайнида ҳокимият тепасида бўлиб, шу давр ичида содир этган жиноятлари туфайли «Африка Пиночети» номини олган эди. Ҳуқуқ ҳимоячиларининг уқтиришича, у 40 мингдан ортиқ одамнинг ўлимида айбдор.
Изоҳ (0)