Facebook’даги «Водители Ташкента» гуруҳида деярли ҳар куни Тошкент йўлларидаги баҳсли вазиятларга оид хабарлар эълон қилинади, бу хабарларга фото ва видеодалиллар илова қилинади.
Бу хабарларда бир ҳайдовчи бошқа бир ҳайдовчининг қоидага зид ҳаракати устидан шикоят қилади ёки учинчи бир ҳайдовчининг хатти-ҳаракати қанчалик мақсадга мувофиқлиги ҳақидаги савол билан муҳокама бошлайди. Хусусан, сўнгги видеохабарлардан бири ҳам қизғин баҳс-мунозарага сабаб бўлган.
Видеода ўз бўлагидан келаётган автомобиль (видео айнан шу автомобилдаги видеорегистратор ёрдамида олинган) ҳаракатига бурилишни кўрсатадиган милтилловчи чироқни ёқмай, иккинчи бўлакдан чиқиб келган Matiz қисман бўлса-да халал берганини кўриш мумкин.
Видеорегистраторли автомобиль ҳайдовчиси авариявий ҳолат олдини олиш мақсадида овозли сигнал берган, шундан сўнг Matiz ҳайдовчиси ортидан келаётган машина йўлини тўлиқ тўсиб, автомобилидан тушиб келган ва сигнал берган ҳайдовчи билан муносабатларга ойдинлик киритиб олишга уринган.
Видеода икки ҳайдовчининг суҳбатини ҳам эшитиш мумкин. Уларнинг мулоқоти қуйидагича кўриниш олган:
Видео муаллифи: — Йўл(им)га чиқиб келяпсан-ку! Чиқадиган бўлсанг, (милтилловчи) чироқни ёқиб чиқмайсанми? Сенинг йўлинг эмас-ку.Matiz ҳайдовчиси: — ...Чиқяпман!— Қандай чиқасан?!— Нимага тиқиляпсан?— Мени йўлим-ку!— Ҳа, нима қилай, уёқда (мени) сиқиб кетаётган бўлса?!— Чиқиб келаётганингни (билдириш учун) ҳеч бўлмаса (милтилловчи) чироғингни ёқ.— Қаерга ёқаман? Ёқмайман!— Нега ёқмайсан?— Ёқмасдан юраман шунақа!— Зўрмисан шунчалик?— Ҳа, зўрман! Туш, зўрмисан сен ҳам?— Нима «туш»?— Зўрмисан сен ҳам? Туш, гаплашамиз.— Жойига бориб гаплашайликми?— Қаерга бориб гаплашасан? Хоҳлаган жойингда гаплашаман!— Прокуратурага, мисол учун.— Бўл, кетдик, юр!— Бўлди, ўзим топиб оламан сени.— Бўлди, қачон топасан?— Сен юравер, ўзим топиб оламан сени.— Қачон топасан, ақлли?— Топиб оламан, юравер сен.
Видеохабар остида 100 дан ортиқ фикр билдирилган. Бир гуруҳ фойдаланувчилар видеохабар муаллифини танқид қилиб, келишмовчиликни ва бу видеони муҳокамага қўйиш мақсадга мувофиқ эмаслигини таъкидлаган. Баъзилар бу видеохабарнинг чиқарилишини «номардлик» деб баҳолаган, видео муаллифини қўрқоққа чиқариб, уни «ўзи учун жавоб беролмайдиганлар тоифасидан» деб атаганлар ҳам бор.
«Милтилловчи чироғини ёқса, кўнглингингиз жойига тушармиди?!», — қабилидаги фикрларни ҳам кўплаб ўқиш мумкин. Шунингдек, баъзи фойдаланувчилар видеорегистраторли автомобилдаги сигнални шубҳа остига олган — автомобиль ишлаб чиқарувчи корхона томонидан бундай машиналарга бунақанги сигналлар ўрнатилмаслиги, сигнал овози жуда баландлиги таъкидланган. Бироқ видеорегисторли автомобиль русумига ҳеч ким аниқлик киритмаган.
Айни вақтда, аксарият фойдаланувчилар Matiz ҳайдовчисининг хатти-ҳаракатини қоралаган. «Signal бериш мумкин бўлмаса энди, яқинда юришни ҳам тақиқлаб қўйишса керак», — деб ёзган фойдаланувчилардан бири. «Шундай ҳайдовчилар ҳам бор — на милтилловчи чироқни, на ҳурматни билади», — деб ёзган бошқа бир фойдаланувчи. «Водители Ташкента» гуруҳи аъзолари ҳайдовчиларнинг ўзаро ҳурматни сақлаган ҳолда ҳаракат қилиши йўлларда шунга ўхшаш кўнгилсиз ҳодисалар олдини олишга хизмат қилишини таъкидлаган.
Изоҳ (0)