ОАВ: Туркияда Истанбулдаги терактга алоқадорликда гумонланиб 6 киши ҳибсга олинди

Туркияда Истанбул аэропортидаги терактга алоқадорликда гумонланиб 7 июль, пайшанба куни яна олти нафар чет эллик қўлга олинди. Бу ҳақда AFP агентлиги 8 июль, жума куни маълум қилди, дея хабар бермоқда «ТАСС».

Ҳибсга олиш 7 июль куни Истанбулда полиция рейди давомида амалга оширилган.

Агентликнинг маълум қилишича, барча қўлга олинганлар ИШИД террорчилик гуруҳининг аъзолари эканлиги тахмин қилинмоқда. Улар қайси давлатларнинг фуқаролари эканлигига аниқлик киритилмаган.

Туркия ҳукумати Истанбул аэропортидаги теракт юзасидан суриштирув доирасида 4 июлдан 5 июль, сешанбага ўтар кечаси 17 нафар шахс, жумладан Россиянинг 11 нафар фуқаросига нисбатан айблов эълон қилган. 3 июль куни шу каби айблов 13 нафар гумонланувчи, жумладан, уч нафар чет элликка нисбатан илгари сурилган эди.

Эслатиб ўтамиз, Туркиянинг Истанбул шаҳридаги Отатурк номли халқаро аэропортда 28 июнь куни теракт содир этилган эди. Ҳодиса оқибатида 40 дан ортиқ киши ҳалок бўлди ва 240 га яқин киши жабрланди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.