Марко Матерацци: ЖЧ–2006 финалида аҳмоқона гап айтганман, аммо Зиданнинг онасини ҳақорат қилмагандим
Футбол бўйича Италия терма жамоасининг собиқ ҳимоячиси Марко Матерацци Францияга қарши (1:1, пенальтилар серияси – 5:3) ЖЧ–2006 финал баҳсида Зинедин Зидан билан бўлиб ўтган можаро ҳақида сўзлаб берди, деб хабар бермоқда «Чемпионат».
Ўша ўйинда Зидан Матераццининг сўзларига жавобан унинг кўкрагига боши билан зарба берганди. Натижада франциялик футболчи қизил карточка олиб, майдонни тарк этган эди.
«Мен аҳмоқона гап айтган эдим, лекин бундай жавобга лойиқ эмасдим. Ишонинг, Неаполь, Милан, Рим ёки Париж кўчаларида бунданда ёмонроқ гапларни эшитамиз. Онани ҳақоратлаш? 15 ёшлигимда онам вафот этган ва мен бошқа кимсанинг онасини ҳеч қачон ҳақорат қилмайман. Мен унинг синглиси ҳақида гапиргандим. Ҳозир бунинг аҳамияти йўқ. Мен ҳеч кимдан хафа эмасман», – деди Матерацци.
