Европа футбол уюшмалари иттифоқи (УЕФА) Евро–2016 турнири чорак финал учрашувлари олдидан Истанбул аэропортида содир этилган теракт оқибатида ҳалок бўлганлар хотирасига 1 дақиқа сукут сақламасликка қарор қилди. Бу ҳақда, УЕФАга таяниб, Associated Press журналисти Роб Харрис Twitter’даги саҳифасида маълум қилди.
«Евро–2016 турнири 1/4 финали олдидан 1 дақиқа сукут сақланмайди. УЕФАнинг маълум қилишича, агар фожиа футболга ёки турнир мезбони (Франция)га бевосита боғлиқ бўлса 1 дақиқа сукут сақланади», – деб ёзди Харрис.
Эслатиб ўтамиз, 28 июнь куни уч худкуш Истанбул аэропорти халқаро терминалини портлатиб юборди. Теракт натижасида, сўнгги маълумотларга кўра, 43 киши ҳалок бўлди, 239 киши жароҳат олди. Туркия ҳукумати теракт муносабати билан мамлакатда умуммиллий мотам эълон қилди.Маълумот учун, Евро–2016 турнири чорак финал учрашувлари 30 июнь – 3 июль кунлари бўлиб ўтади.
Изоҳ (0)