«Ўзбекистон» телеканали орқали 30 июнь, чоршанба куни эфирга узатилган «Аҳмад васвасаси» номли кўрсатувда нима учун унинг фаолияти бир неча йил давомида тўхтатилмагани ёки текшириб кўрилмагани ҳақидаги саволга ҳам жавоб берилди.
«Аҳмад Турсунбоевдан наф кўраётган маҳаллий амалдорлар, ҳуқуқ-тартибот органи вакиллари унинг бу ишларига панжа ортидан қараб келган. ‘Еган оғиз уялар’ деганларидек, улар Аҳмадбойни фош қилиш ўрнига жиноий шериклик қилиб келгани тергов-суриштирув жараёнида аниқланяпти», — дейилди «Аҳмад васвасаси» кўрсатувида.
Асли Аҳмаджон Турсунбоев тегишли «Чиноз авто ҳамкор» компаниясида юрист лавозимида ишлаган Ойбек Исоқов шундай дейди: «Катта лавозимдаги одамлар мижоз бўлганини ўзи ҳам айтарди, ҳоким келди ёки милиция келди деб кассадагилар ҳам мақтаниб ўтиришарди. Машҳур артистлар, катта лавозимдаги кишиларнинг номларини айтишар, бири 300 минг, бошқаси 400 минг пул бериб, мижоз бўлди, деган гаплар бўларди».
«Ҳоким билан телефонда бир нарсаларни гаплашарди, нималарни гаплашишини билмасдим. Ҳоким-бува деб гаплашганини икки-уч марта сездим», — деди кўрсатувда Аҳмаджон Турсунбоевнинг яқин маслаҳатчиларидан бири деб кўрсатилган собиқ милиционер Тоҳир Мустафоқулов.
«Мансаб ваколатини суиистеъмол қилиб, Аҳмад Турсунбоевнинг ноқонуний фаолиятига раҳнамолик қилиб келган мансабдор шахсларнинг ҳатти-ҳаракатларига тергов жараёнида тегишли ҳуқуқий баҳо берилади», — дея қўшимча қилинди «Аҳмад васвасаси» кўрсатувида.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)