Ҳиндистон, Покистон ва Эроннинг Шанхай ҳамкорлик ташкилотига қабул қилиниши Евросиё иқтисодий макони ривожланишида муҳим босқич бўлади. Бу ҳақда Қозоғистон президенти Нурсултон Назарбоев маълум қилди, дея хабар беради «ТАСС».
«Шанхай ҳамкорлик ташкилоти Евросиё ҳудудидаги ўта муҳим ташкилот. Ҳозир унинг учун ўта муҳим босқич — Тошкентда Ҳиндистон ва Покистонни аъзоликка қабул қиламиз. Навбатда эса Эроннинг ташкилотга кириш масаласининг кўриб чиқилиши. Бу давр олдимизга қўяётган чақириқларга жавобдир», — дея таъкидлаган Назарбоев «ТАСС» бош директорининг биринчи ўринбосари Михаил Гусманга берган интервьюсида.
Назарбоевга кўра, АҚШ саъй-ҳаракатлари билан Тинч океани ва Трансатлантика минтақасида эркин савдо ҳудуди тузилиши эҳтимоли бунга муқобил тарзда Евросиёда давлатларнинг иқтисодий блоки шакллантирилишини тақозо этади.
«Агар АҚШ Тинч океани ва Трансатлантика минтақасида эркин савдо ҳудудини тузса, биз ўртада қолиб кетамиз. Шу сабабли бу ерда учинчи иқтисодий ҳамжамият, улкан ва ўта муҳим бўлган учинчи уюшма пайдо бўлмоқда», — дея маълум қилган Қозоғистон президенти.
Изоҳ (0)