McDonald’s тармоғига Хитой ва Гонконгдаги бизнесини сотиши учун 3 млрд доллар таклиф этилди

McDonald’s тез овқатланиш тармоғи Хитой ва Гонконгдаги бизнесини сотиш юзасидан бир неча таклифлар олди. Бу ҳақда «РБК» хабар бермоқда.

Reuters манбаларига кўра, компания Хитойнинг Beijing Tourism Group, Sanpower ва ChemChina каби йирик корпорацияларидан таклиф олган. Келишув амалга ошган тақдирда унинг суммаси 3 миллиард долларни ташкил этиши мумкин.

Компания шу йил март ойида яқин беш йил мобайнида Хитой, Гонконг ва Жанубий Кореяда 1,5 мингдан ортиқ ресторан очиш режаларини эълон қилганди. Ҳозирда McDonald’s ушбу мамлакатларда 2,8 минг ресторанга эга. Тармоқ бош директори Стивен Истербрукка кўра, McDonald’s Хитойни ресторанлар сони бўйича АҚШдан кейинги иккинчи мамлакатга айлантириш ниятида.