Айрим қисқа муддатли кометаларнинг танаси иккига бўлиниб, сўнг яна бирлашиши мумкин. Бу ҳақда бир гуруҳ олимлар махсус тадқиқот якунларига кўра маълум қилди, деб хабар бермоқда Naked Science.
Пердью университети ҳамда Боулдердаги Колорадо университети тадқиқотчиларининг аниқлашича, Қуёш атрофида 200 йиллик давр мобайнида айланадиган айрим муддатли кометаларнинг таналари мунтазам равишда иккига бўлиниб, сўнг қайтадан тўпланади. Олимларнинг фикрича, бу рецидив кометалар эволюциясининг бир қисмидир.
Тадқиқотнинг асосий объекти 67P/Чурюмов — Герасименко қисқа муддатли кометаси бўлди. Тасвирлар унда икки ёриқ ҳосил бўлганини ва улар кометани икки «япроқ»қа бўлаётганини кўрсатди.
Кометанинг ўтмишини қайтадан тиклаш учун олимлар рақамли моделлаштириш методидан фойдаланди. Аниқланишича, кометанинг тезроқ айланиши бундай ёриқларни келтириб чиқариши керак эди. Яъни, агар ҳозирда кометанинг айланиш тезлиги 12 соатни ташкил этса, ёриқлар ҳосил бўлган пайтда бу интервал 7–9 соатга тенг бўлиши лозим эди.
Айланишнинг тезлашиши турли омиллар билан тушунтирилиши мумкин: ернинг тортишиш кучи, газ ажралиши ва ҳоказо. Агар комета иккига бўлинса, бўлаклар бир-биридан унча узоқлашиб кета олмайди.
«Улар бир-бирининг атрофида айлана бошлайди, бир неча ҳафта, кун ва ҳатто соат давомида улар яна бирлашиб, комета ядросининг янги конфигурациясини ҳосил қилади», — деди тадқиқот иштирокчиси, профессор Дэниел Шериз.
Олимлар тадқиқ этган етти кометанинг бештаси «қўш япроқли» бўлиб чиқди.
Изоҳ (0)