30 май, душанба куни дўл аралаш ёққан кучли жала Шимолий Осетия — Алания республикаси пойтахти Владикавказда (Россия) транспорт ҳаракатини қисман фалаж ҳолатга солди. Бу ҳақда TJournal хабар бермоқда.
Табиий офатдан айниқса сув сатҳи енгил автомобиллар капотигача кўтарилган ва ҳайдовчилар ташқарига машина ойнасидан чиқиб олишига тўғри келган марказий кўчалар жабр кўрди.
Шаҳарнинг бир неча туманларида вақтинча электр таъминоти узиб қўйилди ва шу куни кечга бориб қисман тикланди. Ёғингарчилик, шунингдек, Чеченистон ва Волгабўйининг айрим шаҳарларига ҳам ёпирилди.
Ижтимоий тармоқларда табиий офат гувоҳлари томонидан тасвирга туширилган ўнлаб фото ва видеолавҳалар жойлаштирилди.
