Ўзбекистон Республикаси Вазирлар Маҳкамасининг 20 майдаги қарори (pdf) билан 2016—2020 йиллар даврида Тошкент ҳайвонот боғини ривожлантириш концепцияси тасдиқланди, деб ёзади «Газета.uz».
Ҳужжат Тошкент ҳайвонот боғини замонавий маданий-томоша ва илмий-маърифий давлат муассасаси сифатида ривожлантириш, ҳайвонот боғи коллекциясини ноёб ва экзотик ҳайвонлар билан тўлдиришни таъминлаш, шунингдек, ҳайвонларни сақлаш учун қулай шарт-шароитлар яратиш мақсадида қабул қилинди.
Қарорда ҳайвонот боғи ҳудудида юқори технологияли «Акванариум» қуриш ва денгиз жониворлари ва балиқларидан иборат экспозиция яратиш; фаунистик тадқиқотларни ривожлантириш учун замонавий илмий мажмуа, шунингдек, зоология ва зоомуҳандислик лабораториялари барпо этиш; ҳайвонот боғи ветеринария шифохонасининг техник базасини мустаҳкамлаш ва замонавий тиббий ускуналар билан жиҳозлаш назарда тутилган.
Шунингдек, ҳайвонот боғи ҳудудида аудио-гид хизматларини ташкил этиш, ҳайвонот боғининг найвонот дунёси тўғрисида зарур обзорли ахборотни тақдим этган ҳолда йўл кўрсатувчи — электрон харитани ташкил этиш, жумладан, ҳайвонот боғининг бутун ҳудуди бўйича электрон ахборот дисплейларини қўллаш, ҳайвонот боғи маъмурий-бошқарув биноларини кенг полосали Интернет билан таъминлаш вазифалари белгиланди.
Қарорда Самарқанд ва Фарғона шаҳарларида Тошкент ҳайвонот боғининг филиалларини қуриш ва Термиз шаҳри ҳайвонот боғини реконструкция қилиш кўзда тутилган.
Изоҳ (0)