Евро—2016 мусобақасига тайёргарлик кўраётган Испания миллий терма жамоаси 29 май куни Босния ва Герцеговина термаси билан ўртоқлик ўйинида майдонга тушди ва 3:1 ҳисобида зафар қучди.
Учрашувнинг 45-дақиқасида кичик жанжал келиб чиқди ва у меҳмонларнинг ёши энг катта футболчиси Эмир Спахичнинг майдондан четлатилиши билан якунига етди. Жамоадоши Вранешни ҳимоя қилиш учун етиб келган Спахич «Челси» сафида тўп сурадиган испаниялик икки футболчига тарсаки туширишга қарор қилди. Аввалига Сесар Аспиликуэта Спахичнинг кафти билан юзлашган бўлса, кейинроқ Сеск Фабрегас шундай ҳолатда қолди.
Спахич бунга қадар битта гол уришга муваффақ бўлганди. Иккинчи тайм олдидан эса Босния ва Герцеговинанинг майдонда бир киши кам бўлиб қолишига сабабчи бўлди.
Германиянинг «Гамбург» клуби шарафини ҳимоя қиладиган Эмир Спахич 2015/16 йилги мавсум якунига кўра жамоасининг энг кўп марта огоҳлантирилган футболчиси бўлди. 26 учрашувда Бундеслига ҳакамлари уни 7 марта огоҳлантирди ва 1 марта майдондан четлатди.
Қайд этиш керак, Испания терма жамоаси Евро—2016 «Д» гуруҳида Хорватия, Чехия ва Туркияга қарши кураш олиб боради. Босния ва Герцеговина терма жамоаси эса плей-оффда Ирландиядан енгилиб, Европа Чемпионатини қўйиб юборадиган бўлганди.
Халқаро ўртоқлик учрашуви 29 май, якшанба
Испания — Босния ва Герцеговина 3:1
Голлар: Нолито, 11 (1:0). Нолито, 18 (2:0). Эмир Спахич, 29 (2:1). Педро, 90 (3:1).Четлатиш: Эмир Спахич, 45+1 (Б).
Изоҳ (0)