«Реал» Европа Чемпионлар Лигасида 11-бор ғолибликни қўлга киритди

Европа Чемпионлар Лигаси финалида «Атлетико»ни пенальтилар сериясига кўра мағлуб этган Мадриднинг «Реал» клуби 11-бор бош совринга эга чиқди. Бу рекорд кўрсаткич, деб ёзди УЕФА расмий сайтининг Twitter’даги саҳифаси.

• «Реал Мадрид» — «Атлетико Мадрид» 1:1. Пенальтилар серияси — 5:3. Матнли онлайн

Учрашувнинг асосий вақтида ғолиб жамоани аниқлашнинг имкони бўлмади. 15-дақиқада Серхио Рамос ҳисобни очган бўлса, 79-дақиқада захирадан майдонга тушган Феррейра-Карраско мувозанатни тиклади. Қайд этиш керак, Чемпионлар Лигасининг 2013/14 йилги мавсуми финалида ҳам Мадрид клублари асосий вақтда масалани ҳал қила олмаганди.

• Сўровнома: Европа Чемпионлар Лигаси финалида ким ғалаба қозонади — «Реал»ми «Атлетико»?

Қўшимча сифатида ўйиннинг 48-дақиқасида «Атлетико» футболчиси Антуан Гризманн пенальтидан аниқ фойдалана олмаганини эътироф этиш лозим. Унинг зарбасидан кейин тўп дарвоза тўсинига тегиб қайтди. Сўнгги бор Чемпионлар Лигасининг 2012 йилги финалида голландиялик футболчи Арьен Роббен 11 метрлик жарима зарбасини гол билан якунлай олмаганди.

«Реал» ҳимоячиси Серхио Рамос эса Чемпионлар Лигасининг финалида 2 та гол ура олган биринчи ҳимоячи сифатида тарихга кирди. Унинг биринчи голи ҳам айнан «Атлетико» дарвозасига киритилган бўлиб, икки йил муқаддам Испания терма жамоаси аъзоси 93-дақиқада «Реал»ни мағлубиятдан қутқариб қолганди.

Ўйиннинг қўшимча дақиқаларида ҳисоб ўзгармади ва ғолиб пенальтилар сериясига кўра аниқланадиган бўлди. Дастлабки учтадан зарбада ҳеч бир футболчи хатога йўл қўймаган бўлса, «Атлетико» сафида Хуанфран томонидан берилган зарбадан кейин тўп дарвоза устунига тегиб қайтди. Роналдунинг ҳал қилувчи зарбаси эса «Реал»га чемпионлик кубогини тақдим этди.

Маълумот учун, «Атлетико» ўз тарихида уч бор Чемпионлар Лигасининг финалида иштирок этган ва уларнинг барчасида енгилган клуб бўлиб қолди.

Европа Чемпионлар ЛигасиФИНАЛ 28 май, шанба

«Реал» (Испания) — «Атлетико» (Испания) 1:1 пен: 5:3

Голлар: Серхио Рамос, 15 (1:0). Янник Феррейра-Карраско, 79 (1:1).Ноаниқ пенальти: Антуан Гризманн, 48 (А).«Реал»: Кейлор Навас, Пепе, Серхио Рамос, Марсело, Даниэль Карвахаль (Данило, 52), Каземиро, Тони Кроос (Иско, 72), Лука Модрич, Гарет Бэйл, Карим Бензема (Лукас Васкес, 77), Криштиану Роналду.«Атлетико»: Ян Облак, Диего Годин, Хуанфран, Стефан Савич, Филипе Луис (Лукас Фернандес, 109), Габи, Аугусто Фернандес (Янник Феррейра-Карраско, 46), Коке (Томас, 116), Сауль, Фернандо Торрес, Антуан Гризманн.