АҚШ Конгрессида 2017 йил мамлакат ҳарбий бюджетига портларига Россия ҳарбий кемалари киришига рухсат берадиган НАТО мамлакатлари ҳақида Пентагондан ҳисобот олиш талаб қилинадиган тузатиш киритилди. Бунга Испаниянинг Сеута порти туртки бўлгани билдирилмоқда, дея хабар беради «РБК».
Ҳарбий бюджетга тузатиш киритишни Пенсильвания штатидан конгрессмен, республикачи Жо Питтс таклиф этди. Унинг айтишича, «Испания Россия кемаларига Сеута портига киришига рухсат бериши НАТО давлатлари бирдамлигига рахна солади. Альянс умумий позицияга эга бўлиши ва Россия ҳарбий кемаларини ўз портларига қўймаслиги зарур».
АҚШ Конгрессида Испанияга нисбатан танқид мамлакатнинг Шимолий Африка соҳилларидаги Сеута портига май ойида Россиянинг «Ладний» қўриқчи кемаси кирганидан сўнг (экспертлар ҳисобига кўра, 2011 йилдан бери бу ерда Россиянинг 57 ҳарбий кемаси тўхтаган) янгради. Бироқ Мадрид Россия ҳарбий-денгиз флоти кемаларини қабул қилиш мамлакатга нисбатан жорий этилган санкциялар тартибини бузмаслигини маълум қилди. Ундан ташқари, россиялик ҳарбийлар Испаниянинг қашшоқ минтақаларидан бўлган Сеута бюджетига қўшимча даромад келтирмоқда. El Pais маълумотларига кўра, 2014 йилнинг ўзида шаҳарга 2300 нафар рус денгизчиси келган ва ҳар бири ўртача 450 евро сарфлаган.
Изоҳ (0)