Тошкент шаҳридаги «Ҳилолнашр» нашриёт уйида Шайх Муҳаммад Содиқ Муҳаммад Юсуф қаламига мансуб олти жилдлик «Тафсири ҳилол»нинг иккинчи нашри чоп этилганлиги муносабати билан тақдимот маросими бўлиб ўтди. Бу ҳақда «Qadriyat.uz» хабар бермоқда.

«‘Тафсири ҳилол’ — бутун оламга мударрис бўлган буюк уламолар юрти — Мовароуннаҳр диёрида ёзилган энг янги тафсирдир. Шайх Муҳаммад Содиқ Муҳаммад Юсуфнинг ушбу тафсири ўзининг содда ва равон тили, теран ва дақиқ услуби билан ажралиб турувчи шоҳ асардир.

‘Тафсири ҳилол’ мўътабар тафсирларнинг анъаналарига содиқ қолган ҳолда, бугунги кун китобхонининг савияси, дунёқараши ва эҳтиёжларини ҳам ҳисобга олиб ёзилган», — дейилади «Qadriyat.uz» хабарида.

Маросимда сўзга чиққан Ўзбекистон мусулмонлари идораси Фатво бўлими мудири Абдулҳамид Турсунов янги нашр муносабати билан ЎМИ ва муфтий Усмонхон Алимов табригини етказди.

Ушбу тўпламни фақатгина «Ҳилолнашр» нашриёт уйи дўконларидан харид қилиш мумкин.