Ўзбекистон Республикаси Президенти Ислом Каримов «2016—2017-ўқув йилида Ўзбекистон Республикасининг олий таълим муассасаларига ўқишга қабул қилиш тўғрисида»ги қарорни имзолади. Ҳужжат матнини ЎзА тақдим этди.
Қарорда таъкидланишича, иқтисодиёт тармоқлари ва секторларининг олий маълумотли мутахассислар билан амалда таъминланганлигини экспертизадан ўтказиб баҳолаш натижаларига кўра бакалавриат тайёрлашнинг 18 та янги мутахассислиги жорий этилишини назарда тутувчи олий таълим йўналишлари ва мутахассисликлари рўйхатига тегишли ўзгартиришлар киритилди.
Шунингдек, 2016—2017-ўқув йилида олий таълим муассасаларига ўқишга қабул қилиш квоталари шакллантирилди. Унга кўра, 2016—2017 ўқув йили учун бакалаврларни 57 907 нафар, шу жумладан, давлат грантлари бўйича – 19 120 ва тўлов-контракт асосида – 38 787 нафар миқдорида; магистрларни 5000 нафар, шу жумладан, давлат грантлари бўйича – 1548 ва тўлов-контракт асосида – 3452 нафар миқдорида қабул қилиш белгиланди.
Бундан ташқари, Тошкент кимё-технология институти (Қўнғирот бўлими)нинг махсус сиртқи бўлимида бакалаврларни тайёрлаш давлат грантлари бўйича 65 нафар ва Тошкент ахборот технологиялари университетининг махсус сиртқи бўлимида – 50 нафар, шу жумладан, давлат грантлари бўйича – 15 нафар ва тўлов-контракт асосида – 35 нафар қабул қилиш умумий квоталари белгиланди.
Эслатиб ўтамиз, ўтган йилги қабул квотаси ҳам худди шу миқдорда эди.
Изоҳ (0)