Эмомали Раҳмон Тожикистонда Президент кунини нишонлаш ҳақидаги тузатишларни имзолади

Тожикистон етакчиси Эмомали Раҳмон 14 май, шанба куни «Байрам кунлари ҳақида»ги қонунга тузатишларни имзолади. Олдинроқ парламентнинг икки палатаси томонидан тасдиқланган мазкур тузатишларга кўра, мамлакатда 16- ноябрь Президент куни деб эълон қилинади, дея хабар беради «Интерфакс».

Давлат раҳбари матбуот хизматининг билдиришича, «ушбу қонун жаҳон тажрибаси ва Тожикистон республикаси президенти, миллат етакчисининг тожиклар янги давлатчилиги шаклланиши, тинчлик, барқарорлик ва миллий бирликни таъминлаш, халқаро саҳнада мамлакат нуфузини кўтаришдаги бебаҳо ҳиссасини эътиборга олган ҳолда қабул қилинган».

Энди Тожикистонда 80 байрам куни бўлиб, улардан 10 куни дам олиш ҳисобланади. Президент куни эса иш куни саналади.

Маълумот учун, мамлакатда халқаро байрамлардан ташқари, ўзларигагина хос бўлган айёмлар, жумладан, Боғ байрами (мартнинг иккинчи якшанбаси), Рудакий куни (22 сентябрь), мавлоно Жалолиддин Балхий куни (30 сентябрь) ҳам нишонланади.