Футбол бўйича Ўзбекистон миллий терма жамоаси сардори ҳамда «Краснодар» клуби ярим ҳимоячиси Одил Аҳмедов «Крилья Советов»га қарши (3:0) Россия чемпионати 28-турида жароҳат олди, деб хабар бермоқда «ФНК».
Ўзбекистонлик футболчи ўйиннинг 15-дақиқасида жароҳат олиб майдонни тарк этди. Унинг ўрнига захирадан Юрий Газинкий майдонга тушди.
«Соннинг орқа қисмини шикастладим. Жароҳат қанчалик оғир эканини билмайман. Эртага тиббий кўрикдан ўтаман, лекин жароҳат жиддий эмаслигини ҳис қияпман», – деб маълум қилди Аҳмедов «Sportbox.ru» мухбири билан суҳбатда.
Навбатдаги ғалабадан сўнг «Краснодар» очколари сонини 53 тага етказиб, 4-ўринга кўтарилиб олди. Биринчи ўринда бораётган ЦСКА ҳисобида 59, иккинчи поғонадан жой олган «Зенит»да 55 очко мавжуд. Захирасида битта ўйинни сақлаб турган «Ростов» 54 очко билан кучли учликдан жой эгаллаб турибди.
Маълумот учун, жорий мавсумда Одил Аҳмедов Россия чемпионатининг 27 ўйинида майдонга тушиб, 3 та гол ва 3 та голли узатмага муаллифлик қилган.
Изоҳ (0)