Қирғизистонда шиддатли шамол 900 га яқин уйнинг томини учириб кетди

Қирғизистоннинг Боткен ва Талас вилоятига ёпирилган кучли жала ва шиддатли шамол турар-жойлар, ижтимоий объектлар ва йўл инфратузилмасига жиддий зарар етказди, дея хабар бермоқда «Интерфакс» республика фавқулодда вазиятлар вазирлигига таяниб.

9 май куни Боткен вилоятида кузатилган, тезлиги сониясига 28 метрга етган кучли шамол 869 та уй, 17 та ижтимоий объектни томсиз қолдирди, дарахтларни қулатди, электр узатиш симларини узди, натижада бир нечта аҳоли пунктлари чироқсиз қолди. Икки кеча-кундуз давомида тинмаётган жала турар-жойлар, мактаблар ва касалхоналарни сув остида қолдирди, кўприкларни бузди, аҳоли пунктлари ўртасидаги автомобиль қатновини издан чиқарди.

Талас вилоятида 9 май куни катта-катта дўл ёғиб, қишлоқ хўжалик экинларини пайҳон қилди. Кучли шамол эса дарахтларни илдизи билан суғуриб, реклама устунларини ағанатди, уйлар томларини учирди.

Қирғизистонда ёмғирли ҳаво 12 майгача сақланиб қолиши айтилмоқда, шу туфайли бутун республикада, айниқса, тоғли ҳудудларда сел келиши ва ерлар ўпирилиши хавфи бор.