Нью-Йоркдаги соҳилдан оёқлари цементланган эркак жасади топилди

Бруклиндаги соҳилга (Манхэттен пляжи) боши изолента билан ўраб ташланган, қўллари боғланган ва оёқлари цементли челакка ботирилган эркак жасади чиқиб қолди, деб ёзади «РИА Новости».

Пластик халтага солинган мурдани ўткинчилардан бири тасодифан кўриб қолди.

Нью-Йорк полиция департаментида жасад 28 ёшли Петер Мартинесга тегишли деб гумон қилишди. Полициячилар маълумотига кўра, эркак G Stone Crips жиноий гуруҳи аъзоси бўлган ва 30 мартадан кўпроқ жиноий жавобгарликка тортилган.

Февраль ойида эркак тўсатдан ғойиб бўлган, бу ҳақда унинг маъшуқаси хабар қилган.

Оммабоп миш-мишларга кўра, ўз қурбонларини бундай ҳолатга мафия келтиради.

Оёқларига бетон блоклари боғланган жасадлар бунгача 1941 йилда Нью-Жерсида ва 1964 йилда Нью-Йоркда топилган.