Малайзиянинг «Мелака Юнайтед» жамоаси дарвозабони, 18 ёшли австралиялик Стефан Петровски яшин уришидан сўнг қарийб бир ой ўтиб вафот этди. Бу ҳақда Австралия футбол федерациясига таяниб, «ТАСС» хабар бермоқда.
«Бутун Австралия футболи ҳамжамияти номидан федерация Петровскининг оиласи, дўстлари ва жамоадошларига чуқур ҳамдардлик билдиради», – дейилади Австралия футбол федерацияси баёнотида.
5 апрель куни клубнинг машғулотларида Петровски ва унинг жамоадоши, 21 ёшли ҳимоячи Мухд Афик Азуанни яшин урган эди. Бунинг оқибатида Азуан енгил жароҳат олган, Петровски эса ҳушидан кетганди. Шундан сўнг, ҳар икки футболчи шифохонага ётқизилганди. Кома ҳолатига тушиб қолган Петровски эса интенсив терапия палатасига ўтказилди. Дарвозабоннинг авҳоли барқарор экани хабар қилинганди, бироқ у сунъий равишда ўпкада ҳаво алмаштириш мосламасига уланган эди.
«Чемпионат» нашрининг маълум қилишича, австралиялик ёш дарозабон кеча, 1 май куни ҳаётдан кўз юмди.