Мисрнинг сайёҳлик соҳасидаги даромади 2016 йил биринчи чорагида 500 миллион долларни ташкил қилди, бу ўтган йилнинг шу даврига нисбатан 66 фоизга кам демакдир. Бу ҳақда мамлакат сайёҳлик вазирлиги иқтисодий маслаҳатчиси Адла Рагабага таяниб, «Интерфакс» хабар бермоқда.

2015 йил биринчи чорагида сайёҳлик туфайли мамлакат бюджетига 1,5 миллиард доллар келиб тушган эди. Мисрга ташриф буюрган сайёҳлар сони ҳам 2016 йил биринчи чорагида 1,2 миллион нафаргача камайди, 2015 йилнинг шу даврида эса мамлакатга 2,2 миллион сайёҳ келган эди.

Миср ҳукумати апрелда ярим йил ичида мамлакатга хориждан келадиган сайёҳлар оқимини қайта тиклаш бўйича янги режани таклиф қилган эди. У чет эллик шериклар билан ҳамкорлик, сайёҳлик инфратузилмасини ривожлантириш, миллий ташувчиларни қўллаб-қувватлаш ва туризм соҳасига инвестициялар жалб қилишни ўз ичига олади. Бироқ хавфсизлик муаммоларига етарлича эътибор қаратилмаётгани туфайли, экспертлар унинг муваффақиятига шубҳа қилмоқда.

Эслатиб ўтамиз, 2015 йилнинг 31 октябрь куни Россиянинг «Когалимавиа» компаниясига тегишли Airbus A321 самолёти Синайда қулади. Бортда бўлган 217 йўловчи ва экипажнинг етти нафар аъзоси ҳалок бўлди. Россия ҳукумати фожиани теракт деб баҳолади.

8 ноябрь куни Россия президенти Владимир Путин фармон имзолади, унга кўра, Россия фуқароларининг Мисрга ҳаво орқали ташилиши тўхтатилди. Сайёҳлик операторлари ва агентликларига тақиқ амалда вақтида ушбу мамлакатга йўлланмалар сотишдан тийилиш тавсия этилди.