Ўзбекистон Вазирлар Маҳкамаси қарори билан Тошкентдаги Турин политехника университетига 2016—2017-ўқув йили учун қабул квотаси белгиланди. Бу ҳақда университет матбуот хизмати хабар бермоқда.
Янги ўқув йилида бакалавриатда таълим олиш учун тўлов-шартнома асосида 350 киши қабул қилинади, бу ўтган йилдагидан 100 кишига кўп демакдир.
«Машинасозлик технологияси» мутахассислиги бўйича қабул квотаси 150 дан 200 кишига, «Ахборот технологиялари ва саноатда БАТ» йўналишида 50 дан 100 кишигача кўпайтирилди. «Энергетика» ва «Саноат-фуқаролик қурилиши ва меъморчилик» мутахассисликларига ўтган йилгидек 25 кишидан қабул қилинади.
«Машинасозлик технологияси» йўналиши бўйича магистратурага эса тўлов-шартнома асосида 25 нафар талабани қабул қилиш режалаштирилмоқда.
Маълумот ўрнида: Тошкентдаги Турин политехника университети 2009 йилнинг 27 апрелида Ўзбекистон Президентининг қарори билан ташкил қилинган.
Изоҳ (0)