Тошкент шаҳридаги барча трамвай йўналишлари ёпилади. Бу ҳақда, «Газета.uz» хабарига кўра, Тошкент шаҳар ҳокими Раҳмонбек Усмонов 28 март, душанба куни бўлиб ўтган матбуот анжуманида маълум қилди.
Хабар беришларича, мазкур қарор автомобиль транспорти сонининг мунтазам ортиб бораётгани, кўча тармоқларининг етарли даражада ривожланмагани ва трамвай йўналишларининг самарасиз фаолияти сабаб қабул қилинган.
Ўзбекистон пойтахтидаги трамвай йўлларини демонтаж қилиш ишлари давом эттирилади — жами 87,8 километр релс, хусусан, Муқимий, Самарқанд дарвоза, Меҳржон-Сайхун, Алиев, Темирйўлчилар, Кичик ҳалқа йўли, Белтепа, Шифокорлар, Тошкент автомобиль ҳалқа йўли, Фарҳод-Тўқимачи, Маннон Уйғур-Бешқайрағоч, Лутфий, Катта Хирмонтепа, Қамарнисо, Форобий, Оҳангарон йўли, Қорасув, Фарғона йўли, Янги Қўйлиқ, Қушбеги ва Бунёдкор кўчаларидаги трамвай йўллари олиб ташланади.
Трамвай йўллари олиб ташланган кўчаларда қатнов қисми кенгайтирилади. Кўчаларни кенгайтириш зарурати бўлмаган жойларда ҳудуд ободонлаштирилади. Кейинчалик фойдаланишга яроқсиз бўлган релсларнинг бир қисми устидан асфальт ётқизилади.
Изоҳ (0)