Тошкентнинг эски шаҳар қисмидаги жарлик кучли зилзила оқибатида юзага келгани маълум бўлди

Facebook’даги Tashkent Retrospective саҳифаси Тошкентнинг эски шаҳар қисмида жойлашган сейсмик ёриқ суратини эълон қилди.

«Шаҳар марказидан ўн дақиқалик масофада жойлашган сейсмик ёриқ. Сирли жой — ‘Жар ариқ’ жарлиги. Бу ердан оқиб ўтган канал 90-йилларда тўлиқ қувурларга жойланган ва кўмиб ташланган. Энди бу ерда шу номли — ‘Жар’ спорт мажмуаси қад кўтарган», — дейилади постда.

Сурат қачон ва ким томонидан туширилгани номаълум, бироқ у илмий-тадқиқот архивидан олинган. У ерда унга нисбатан берилган изоҳга кўра, «Жар» жарлиги Тошкент шаҳрида кузатилган жуда кучли зилзила оқибатида юзага келган сейсмик ёриқ йўлидир.

Ёриқ йўли ер қобиғининг иккита плита бир-бирига нисбатан ҳаракатланадиган қисмидир. Ушбу плиталар ҳаракати кўпинча зилзилаларга сабаб бўлади.