Ҳиндистон шимолидаги Харьяна штатидаги оммавий тартибсизликлар натижасида камида 10 киши ҳалок бўлди, 200 га яқин киши жароҳат олди. Бу ҳақда Харьяна полицияси бошлиғи Яш Пал Сингал маълум қилди, деб хабар беради «ТАСС».
«Тартибни сақлаш кучлари исёнчиларга қарата ўт очишга мажбур бўлмоқда, чунки сўнгги кунларда намойишлар ўз ортидан ўғрилик ва ўт қўйишни етаклаб келаётган оммавий тартибсизликларга айланиб кетмоқда», — деди полиция бошлиғи. Унинг сўзларига кўра, тўқнашувлар натижасида ўндан ортиқ полициячи ҳам жабрланган.
Бир ҳафта олдин жат табақаси вакиллари ҳукуматдан давлат аппарати ва ўқув муассасаларида уларга кўпроқ жой ажратишни талаб қилиб, намойишлар ўтказа бошлади. 19 февраль, жума куни оммавий тўқнашувлар бошланиб кетди. Таёқ ва хипчин билан қуролланган, тажовузкор кайфиятдаги оломон банкоматларни очмоқда, дўкон ва мактабларни ўмариб, уларга ўт қўймоқда. Бундан ташқари, бир қатор йўлларни тўсиб, уларни эгаллаб олмоқда.
Энг кучли норозилик акцияси саккизта округда кечмоқда. Рохтак округида комендантлик соати жорий қилинган, хавфсизлик кучларига зарурат туғилганда огоҳлантиришсиз ўт очишга буйруқ берилган.
Изоҳ (0)