«Донецк Халқ Республикаси» айирмачилари ўлдирилган 17 ёшли футболчи бошини унинг онасига юборди
«Донецк Халқ Республикаси» айирмачилари 2014 йил ёзида ўлдирилган 17 ёшли Степан Чубенконинг бошини унинг онасига жўнатди. Бу ҳақда Донецк вилоят маъмурияти раисининг ўринбосари Игорь Стокоз маълум қилди, дея хабар беради «Сегодня.ua».
Унинг айтишича, йигит Краматорскда яшаган, футбол билан шуғулланган ва маҳаллий «Авангард» ёшлар жамоаси дарвозабони бўлган. Айирмачилар спортчини 2014 йили Донецк атрофида, поездда қўлга олган.
«Йигит ягона ва бўлинмас Украина тарафдори бўлган, айирмачилар билан баҳсга киришган ва шафқатсизларча ўлдирилган. Унинг онаси узоқ вақт сарсон-саргардон бўлиб, охири ўғлининг бошсиз жасадини олди: айирмачилар бош экспертизадан ўтказиш учун Ростовга юборилганини билдирган. Йигит шу ҳолда, ёпиқ тобутда кўмилди. Яқинда эса онага унинг бошини жўнатишган», — дея таъкидлайди Стокоз.
