Ўзбекистонлик чарм қўлқоп усталари Минск (Беларусь) ҳамда Бишкек (Қирғизистон) шаҳарларида ўтказилган анъанавий халқаро турнирларда иштирок этиб, 3 та олтин, 4 та кумуш ва 2 та бронза медалига сазовор бўлди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Беларусь пойтахтида ўн тўққизинчи бор ўтказилган халқаро турнирда 17 давлат вакиллари ғолиблик учун баҳс юритди. Қизғин кечган беллашувларнинг якунларига кўра, Рустам Тўлаганов (-91 кг) ва Мирзоҳид Абдуллаев (+91 кг) барча рақиблари устидан ғалаба қозониб, биринчи ўринни эгаллаган бўлса, Нодиржон Мирзааҳмедов (-49 кг) ва Шахрам Гиязов (-69 кг) кумуш, Шахобиддин Зоиров (-52 кг) эса бронза медалига сазовор бўлди.
2—7 февраль кунлари Бишкек шаҳрида бўлиб ўтган халқаро турнирда ҳам ўзбекистонлик чарм қўлқоп усталари муносиб иштирок этиб, 1 та олтин, 2 та кумуш ва 1 та бронза медалини қўлга киритди.
Ўзбекистон терма жамоаси ҳисобига олтин медални Исроил Мадримов (-75 кг) келтирган бўлса, Сардор Музаффаров (-56 кг) ва Улуғбек Мубинов (+91 кг) финалга қадар кечган жангларни мағлубиятсиз ўтказиб, кумуш медаль совриндори бўлди. Яна бир спортчи Жасурбек Латипов (-52 кг) бронза медали билан тақдирланди.
Изоҳ (0)