Шерали Жўраев Навоийни оммалаштириш ўрнига оммани «Навоийлаштириш» ҳақида қайғуриш кераклигини таъкидлади

Ўзбекистон халқ артисти, таниқли хонанда Шерали Жўраев оммани «Навоийлаштириш» ҳақида қайғуриш кераклигини таъкидлади. Бу ҳақда хонанда «Бекажон» газетасига берган интервьюсида айтиб ўтди.

«Навоийни ‘оммалаштириш’дан кўра, оммани ‘Навоийлаштириш’ ҳақида кўпроқ қайғурсак, тўғри бўларди. Киши то Навоий шеърларини кўнгил мулкига айлантирмаса, ёдлаш орқали уни қалбига муҳрламаса, Навоийнинг руҳият олами унга бегоналигича қолаверади», — деди таниқли хонанда.

«Фарзандларимиз болалигидан бошлаб ҳазрат Навоийнинг шеърларини тошга ўйилган нақшдек қалбга муҳрласа, кейинчалик бу хазина, албатта, ўз эшигини уларга очади», — дея қўшимча қилди Шерали Жўраев.

Эслатиб ўтамиз, 9 февраль куни Алишер Навоий таваллудига 575 йил тўлади.