«Ўзбеккино» Миллий агентлиги буюртмасига асосан тасвирга олинган «Барон» фильмида суратга тушган актёрларнинг барчаси келишилган гонорар пулларини олган. Бу ҳақда фильм режиссёри Рустам Саъдиев «Даракчи» газетасига маълум қилди.
«Иштирок этган актёрларнинг бари келишилган гонорарларни олди. Лекин уларнинг ҳеч бири пул учун ишламади», — дейди Рустам Саъдиев.
«Кўтарилган мавзунинг ижтимоий аҳамиятга эгалиги сабаб, гиёҳвандлик вабосига қарши кураш мавзусида суратга олинган ушбу фильм нафақат ўзбек актёрлари, балки чет эллик ҳамкасбларимиз учун ҳам қизиқ бўлди», — дейди режиссёр.
Рустам Саъдиевнинг қўшимча қилишича, ижодий жамоа мазкур фильм орқали «келажак авлодларимиз соғлом бўлиб ўсишига ҳисса қўшганидан хурсанд».
Маълумот учун, «Барон» фильмида Жавоҳир Зокиров, Улуғбек Қодиров, Шаҳло Темирова, Жамила Ғофурова, Дилноза Кубаева, Муҳаммадисо Абдулхаиров, Сейдулла Молдаханов, Раъно Шодиева, Дилором Эгамбердиева, Шаҳзода Матчонова каби ўзбекистонлик, Фарҳод Маҳмудов, Андрей Смоляков, Виктор Вержбицкий каби россиялик, шунингдек, Голливуд кинолойиҳаларида қатнашган Ҳасан Масъуд каби актёрлар суратга тушган.
Фильмни суратга олиш ишлари учун, турли манбаларга кўра, қарийб 1,5 миллиард сўм сарфланган.
Изоҳ (0)