Хонанда Лола (Йўлдошева) «Бекажон» газетасига берган интервьюсида собиқ турмуш ўртоғи билан ҳозирги муносабатлари, унинг уйланиши, фарзандлари ўртасидаги муносабатлар ҳақида фикр билдирди.
Лоланинг собиқ турмуш ўртоғи Шоҳрух уйлангани ҳақида 18 январь куни маълум бўлди. «Бекажон»даги интервью эса ушбу маросимдан аввал уюштирилган.
«Биз анчадан бери бирга яшамаймиз, ҳар биримизнинг ўз ҳаётимиз бор. Унга яхши муносабатдаман, фарзандларимнинг меҳрибон отаси. Доим яхши турмуш ўртоқ бўлган, шу томонлама уни ҳурмат қиламан», — деди Лола.
«Энг муҳими, биз ажралишдан сўнг ҳам бир-биримизга бўлган ҳурматни сақлаб қолдик. Ўртада фарзандларимиз бор, шу сабаб бугунгача гаплашиб турамиз. У дам олиш кунларини болаларимиз билан бирга ўтказади», — деди хонанда.
«Биласизми, эр-хотин ажрашаётган пайтда, қийин дақиқаларда аввалги меҳр-оқибат, бир дастурхондан чой ичгани, бир ёстиққа бош қўйгани, бир умрга уларни боғлайдиган фарзандлари борлигини унутиб қўяди», — дейди Лола.
«Аслида, ажрим бошига тушган аёл билан эркак, ҳеч бўлмаса, фарзандлари олдида самимий муносабатни сақлаб қолишлари керак. Ахир болаларимиз биздан андоза олади», — деди хонанда.
«Тўйи бўлаётгани, турмуш қураётганига келсак, унга фақат бахт тилайман, унинг бахтли бўлишини хоҳлайман. Насиб бўлса, мен ҳам бир кун келиб, ўз қалбим соҳиби билан оила қураман, бундан у ҳам мамнун бўлади, деган фикрдаман», — дея қўшимча қилди Лола.
Изоҳ (0)