Россияда «Дунё Мисс Университети» номига даъвогарлардан бири атрофида ҳақиқий шов-шув юзага келди, деб ёзади «Nur.kz».
Танлов Хитойда бўлиб ўтмоқда, у ерга Бошқирдистондан Анастасия Яковлева исмли талаба қиз жўнади. Бироқ маълум бўлишича, у ўз ватани эмас, балки Қозоғистон вакиласи сифатида қатнашмоқда. Қиз ижтимоий тармоқларга жойлаётган суратларида ўзи вакиллик қилаётган мамлакат — Қозоғистон номи туширилган тасмани тақиб олган, бироқ, гўёки уялиб, ёзувни қўли билан тўсиб турганини кўриш мумкин.
Хитойга бориши керак бўлган яна бир модель Ева Чашинская кейинроқ ижтимоий тармоқларда хабар беришича, унга Ўзбекистон номидан иштирок этишни таклиф қилишган, бироқ у танловда қатнашишдан бош тортган.
«Мисс Бошқирдистон» модель агентлиги раҳбари Луиза Закирьянова бундай ҳолат гўзаллик танловларида тез-тез кузатилишини таъкидлади. Унинг айтишича, танлов ташкилотчилари Россия учун ажратилган квота тўлгани, ундан вакил борлигини айтиб, бошқа мамлакат номидан қатнашишни таклиф қилган. Закирьянованинг Анастасия Бошқирдистон номидан қатнашиши ҳақидаги сўровига ижобий жавоб беришган, бироқ Хитойга боргач, уни Қозоғистон вакиласи сифатида рўйхатга олиб қўйишгани маълум бўлган.
Айни пайтда қиз Хитойдаги танловда қатнашмоқда, у ўз хатти-ҳаракатларини уйга қайтгач изоҳлаб беришини кутишмоқда. Танлов финали 27 январга белгиланган.
Изоҳ (0)