Саудия Арабистони қироли Салмон бин Абдулазиз ар-Риёдда Хитой халқ республикаси раиси Си Цзиньпин билан музокаралар ўтказди. Уларнинг якуни бўйича томонлар ўртасида 14 та келишув ва меморандум имзоланди, дея хабар беради «ТАСС».
Музокараларнинг бош мавзуларидан бири терроризмга қарши кураш бўлди. Имзоланган ҳужжатларнинг аксарияти икки томонлама, хусусан, энергетика соҳасидаги ҳамкорликни ривожлантиришга тааллуқли эканлиги айтилмоқда. Шунингдек, илмий-техник йўналишдаги, жумладан, сунъий йўлдош навигацияси бўйича алоқаларни кенгайтириш ҳақида келишиб олинди. Хитой ва Саудия вакиллари юқори ҳароратли ядро реактори қуриш тўғрисида меморандумга ҳам имзо чекди.
Хитой раҳбарининг 7 йилдан бери биринчи марта Саудия Арабистонига келгани Яқин Шарқ ОАВда катта қизиқиш уйғотди. Минтақавий сафарини ар-Риёддан бошлаган Си Цзиньпин Миср ва Эронга ҳам ташриф буюради.
Изоҳ (0)