2015 йилнинг ёзида Тошкент шаҳрининг Мирзо Улуғбек туманида содир этилган ЙТҲ оқибатида икки қизнинг ўлимига сабаб бўлган автобус ҳайдовчиси Ҳикмат Қодиров суднинг қарорига асосан қамоқ жазосидан озод этилди. Бу ҳақда «Газета.uz» хабар беради.
20 август куни Қодиров бошқараётган Isuzu автобуси рейс автобусини қувиб ўтишга уриниб, йўлнинг ажратувчи чизиғида турган Мадина Муратшина ва Елена Шишкаловани уриб кетган эди. Мадина воқеа жойида, Елена эса шифохонада вафот этганлиги маълум қилинган эди.
Ҳайдовчига нисбатан Ўзбекистон Жиноят кодексининг 266-моддаси 3-банди бўйича айблов эълон қилинди. Жиноят ишлари бўйича Мирзо Улуғбек туман судининг якуний мажлиси 8 январь куни бўлиб ўтди. Айбланувчи ўз айбига тўлиқ иқрор бўлиб, жиноятни эҳтиётсизлик оқибатида содир этганлигини маълум қилди.
Судья Шермуҳаммад Саидов ҳукм чиқариш чоғида бир қатор вазиятни юмшатувчи ҳолатлар, жумладан, айбдорнинг айбига иқрорлиги ва пушаймонлиги, унинг судланмаганлиги, жиноятни эҳтиётсизлик оқибатида содир этганлиги, шунингдек, оиласининг ягона боқувчиси эканлигини ҳисобга олди. Суд ҳукмига кўра, Ҳикмат Қодиров айбдор деб топилди ва унга нисбатан беш йил муддатга озодликдан маҳрум этиш ва уч йил давомида транспорт воситаларини бошқариш ҳуқуқидан маҳрум этиш жазолари тайинланди.
Шу билан бир пайтда, суд Сенатнинг 3 декабрдаги амнистия ҳақидаги қарорининг 2-бандига («Эҳтиётсизлик орқасида жиноят содир этган шахслар... озод қилинсин») асосланиб, айбланувчини қамоқ жазосидан озод этиш ҳақида қарор қабул қилди.
«Биз, қизларнинг қариндошлари ва яқинлари, суд ҳукмидан ҳайратда қолдик. Икки ёш қизнинг ўлимида айбдор бўлган одам жазосиз қолмоқда. Ота-оналар бу ҳукмни адолатсиз деб ҳисоблайди ва ҳукм устидан шикоят аризаси берилади», — дейди Еленанинг опаси Людмила.
Изоҳ (0)