Қирғизистондаги «АКИпресс» ахборот агентлигининг электрон портали саҳифаларида «Марказий Осиё ҳаёти: ўзбек дўппиларининг сирлари» сарлавҳали мақола эълон қилинди, деб ёзади «Жаҳон» ахборот агентлиги.
Унда мазкур миллий бош кийим тарихи ва унинг кийилишидаги замонавий усуллар хусусидаги батафсил маълумотлар ўз ифодасини топган.
Хусусан, мақолада қайд этилишича, дўппи кийиш урфдан қолмаган. «Уни эркаклар, аёллар, болалар ва кексалар ҳам кийиб юради. Кўпинча дўппини замонавий либослар билан бирга ҳам кийишади».
Мақола давомида мазкур миллий бош кийимининг турли кўринишлари хусусида сўз юритилади. «Ҳар бир вилоят, жумладан, Тошкент, Бухоро, Самарқанд, Фарғона, Хоразм ва Қорақалпоғистон Республикаси ҳамда Қашқадарё ва Сурхондарёнинг ўзига хос кўринишдаги дўппилари мавжуддир. Бундан ташқари, улар байрамона, диний ва доимий кийиладиган турларга эга. Дўппилар юмшоқ ёки қаттиқ матолардан тикилади, кашта ёки майда мунчоқлар билан безатилади ҳамда айлана ёки тўртбурчак шаклда бўлади», — деб ёзади «АКИпресс».
Мақолада қайд этилишича, ўзбек дўппиларида қўлланиладиган барча безаклар, жумладан, ранг, чизиқ, рамзий манзарали ишоралар ҳаёт ва ўлим, нур ва зулмат, ер ва осмон, яхшилик ва ёмонлик сингари умумий тушунчалар билан боғлиқ муҳим хусусиятга эга бўлган маъноларни ўзида мужассам этади.
«Дарҳақиқат, бугунги кунда ўзбек дўпписига бутун дунёда эҳтиёж бор, десак муболаға бўлмайди. Чунки хорижий сайёҳлар дўппини ғайриоддий эсдалик совға ва ҳатто уй безаги сифатида сотиб олишга ҳаракат қилади. Мазкур бош кийими тарихини ўрганиш ва унинг турли кўринишларидан баҳраманд бўлиш истагида бўлган Ўзбекистон меҳмонлари улар билан Давлат халқ амалий санъати ва тарихи музейида танишиш имконига эга», — дея мақолага якун ясайди Қирғизистон ахборот агентлиги.
Изоҳ (0)