Жанубий Кореянинг YTN телеканали КХДР томонидан амалга оширилган водород бомбаси синовини эфирда 1953 йилги Совет кинохроникаси кадрлари орқали кўрсатиб берди, деб ёзади «Газета.ru».
Телетомошабинларга 1953 йил 12 августда Собиқ иттифоқ томонидан «РДС-6c» водород бомбаси синалиши кадрлари намойиш этилди. Биринчи водород бомбаси синови Семипалатинск полигонида бўлиб ўтган эди.
Эслатиб ўтамиз, Шимолий Корея марказий телевидениеси КХДР мамлакат шимоли-шарқида водород бомбасини муваффақиятли тарзда синовдан ўтказганини хабар қилди.
6 январга ўтар кечаси қатор мамлакатларнинг сейсмология хизматлари Шимолий Кореядаги ядровий полигонга яқин ҳудудда 5,1 магнитудали зилзила қайд этилгани, ерости силкинишларига техноген омил (ядровий синовлар) сабаб бўлгани ҳақида ахборот берганди.
Бироқ Жанубий Корея разведкаси КХДРда водородли портлаш содир бўлганини шубҳа остига олди. У 6 январь, чоршанба куни ядро синови натижасида юз берган зилзила магнитудаси етарлича кучли эмас деб ҳисоблайди.
Изоҳ (0)