«Газпром» 2016 йилдан бошлаб Ўзбекистон газини харид қилиш ҳажмини оширади. Бу ҳақда Россиянинг газ холдинги бошқаруви раиси Алексей Миллер журналистларга маълум қилди, деб хабар беради «ТАСС».
«Ҳа, тасдиқлайман. Биз ўзбекистонлик дўстларимиз билан музокараларда эришилган натижаларни юқори баҳолаймиз. Ўзбекистон — газ соҳасида бизнинг ишончли шеригимиз ва биз ўзаро манфаатли ҳамкорлигимизни бундан буён ҳам ривожлантиришда давом этамиз», — деди у.
Олдинроқ «Газпром»даги манба Россия 2016 йилда Ўзбекистондан харид қиладиган газ ҳажми Туркманистон ўтган йили етказиб берганига (3,1 миллиард куб метр) нисбатан кўп бўлишини маълум қилганди. Маълумот учун, Ўзбекистон газ қазиб олувчи дунёдаги энг йирик давлатлар ўнлигига киради (йилига 63—65 миллиард куб метр газ), МДҲ давлатлари орасида эса учинчи ўринни эгаллайди.
Эслатиб ўтамиз, олдинроқ «Газпром» 2016 йилда Туркманистон газини харид қилишдан бош тортгани ҳақида хабар берилганди.
Изоҳ (0)