Тошкентдаги «Олимпия шон-шуҳрати» музейида Ўзбекистон футбол федерациясининг халқаро тоифадаги ҳаками, ФИФА рефериси Равшан Эрматовга «Буюк хизматлари учун» ордени ҳамда Ўзбекистон Республикаси Президенти совғаси – «Malibu» автомобилини топширишга бағишланган маросим бўлиб ўтди. Бу ҳақда «ЎзА» хабар бермоқда.
2003 йилдан буён ФИФА таснифидаги мусобақаларни бошқариб келаётган Р.Эрматов футбол бўйича деярли барча нуфузли турнирларда ҳакамлик қилмоқда. У 2008, 2009, 2010, 2011 ва 2014 йилларда беш маротаба «Осиёнинг энг яхши ҳаками», 2011 йилда «Жаҳоннинг энг яхши ҳаками» сифатида эътироф этилди.
2010 йили Жанубий Африка Республикаси ва 2014 йили Бразилияда ўтказилган футбол бўйича жаҳон чемпионатларида кетма-кет иштирок этди. 2010 йили «Ўзбекистон ифтихори» унвони, 2014 йилда «Эл-юрт ҳурмати» ордени билан мукофотланди.
Давлат раҳбарининг 2015 йил 31 декабрдаги фармонига мувофиқ Равшан Эрматов «Буюк хизматлари учун» ордени билан тақдирланди. «Олимпия шон-шуҳрати» музейида бўлиб ўтган маросимда Ўзбекистон Республикаси Бош вазири Ш.Мирзиёев унга ушбу орден ва Президент совғаси – «Malibu» автомобили калитини топширди.
Изоҳ (0)