Марказий Африка республикаси (МАР) шимолидаги мусулмонлар етакчиси Нуриддин Адам мазкур ҳудудда автономия ташкил этилганини эълон қилиб, марказий ҳукуматдан ажралиб чиқиш ниятини билдирди. Бу ҳақда «ТАСС» хабар бермоқда.
«Биз Логоне республикаси тузилганини эълон қилдик. Ҳозирча автономияни истаяпмиз. Кейинчалик мустақилликка эришиш масаласини ҳал этамиз. Ҳукумат мамлакат шимолини унутиб қўйди. Бу ерда йўллар, касалхона ва мактаблар йўқ», — дея таъкидлаган Адамнинг вакили Мавлуд Мусо.
Нделе шаҳри устида кўтарилган автономия байроғи БМТ тинчликпарвар кучлари томонидан олиб ташланган. МАР ҳукумати вакили Доминик Саид Пангуинжи жаҳон ҳамжамиятини «террорчиларни бартараф этиш учун барча имкониятни ишга солиш»га чақирди. Унинг айтишича, Нуриддин Адам қамоққа олиниши ва Халқаро жиноий судга топширилиши лозим. Ҳукумат уни ҳибсга олишга ордер берди.
Изоҳ (0)